Ги објавил адресите на засолништата за баратели на азил во Велика Британија, па избиле тридневни немири: Британец обвинет за злоупотреба на положбата

Вработен во британската компанија „Серко“, која за Министерството за внатрешни работи обезбедува сместување за баратели на азил, е обвинет за злоупотреба на службената положба поради сомнежи дека јавно објавил адреси на објекти во кои биле сместени баратели на азил, пренесува Би-би-си.

— реклама —

Станува збор за 62-годишниот Џејмс Џобсон од Костеси, во близина на Норич. Тој вчера се појавил пред судот во Ипсвич, каде што му бил определен притвор. Следното рочиште е закажано за 14 септември во судот во Норич.

Обвинението се однесува на периодот од 3 до 14 август, кога Џобсон, како вработен во „Серко“, наводно намерно и без оправдана причина објавил информации за повеќе адреси во градот Тетфорд, во Норфолк.

— реклама —

Само неколку дена подоцна, во Тетфорд избиле тридневни насилни немири. Демонстранти напаѓале куќи за кои верувале дека се користат за сместување на баратели на азил. Полицијата морала да евакуира дел од станарите на безбедно, а во судирите биле повредени и полициски службеници.

— реклама —

Полицијата во Норфолк потврдила дека обвинението против Џобсон е поврзано со објавувањето на информациите за адресите на објектите во Тетфорд, каде што подоцна се случиле повеќедневните насилни протести.

Од „Серко“ соопштија дека целосно соработуваат со истрагата.

— реклама —

„Полицијата во моментов го истражува случајот и ние целосно соработуваме. Бидејќи правната постапка е во тек, не би било соодветно да даваме дополнителни коментари“, изјавил портпарол на компанијата.