Градоначалникот Орце Ѓорѓиевски присуствуваше на регионалната министерска конференција посветена на демографските промени и градењето општествена отпорност, каде што се дискутираше за предизвиците што сè повеќе ја обликуваат иднината на градовите и државите во регионот.
Тој истакна дека Скопје, како главен град, ја поздравува организацијата на конференцијата „Leading Change: People-Centred Paths to Demographic Resilience“, оценувајќи дека ваквите форуми отвораат суштински прашања за идниот развој на општествата.
Ѓорѓиевски посочи дека демографските промени, како иселувањето на младите и стареењето на населението, не се само стратешки предизвик, туку и секојдневна реалност која бара конкретни и одговорни политики.
Тој нагласи дека локалната самоуправа има клучна улога во создавањето услови за подобар живот, бидејќи, како што рече, решенијата започнуваат таму каде што граѓаните живеат и ја градат својата иднина.
Во обраќањето, Ѓорѓиевски посочи дека во Скопје се работи на мерки насочени кон поддршка на младите и семејствата преку подобрување на јавните услуги, инвестиции во образованието, социјалната заштита и урбаниот развој, со цел создавање поинклузивни и одржливи заедници.
Тој додаде дека целта е Скопје да стане град во кој младите ќе остануваат, семејствата ќе се развиваат, а секој граѓанин ќе има пристап до достоинствени услови за живот.
Ѓорѓиевски заклучи дека преку регионална соработка и партнерство со меѓународни организации може да се изградат поотпорни општества, подготвени за современите предизвици, нагласувајќи дека иднината се гради со луѓето и за луѓето.
