Ѓорѓиевски: Депонијата не е на територија на Скопје, водата за пиење е безбедна

Градоначалникот на Скопје, Орце Ѓорѓиевски, уверува дека водата за пиење во Скопје е микробиолошки и хемиски исправна, откако во јавноста се појавија информации за депонија која се поврзува со изворот „Рашче“.

Ѓорѓиевски во објава на социјалните мрежи посочи дека депонијата не се наоѓа на територијата на Град Скопје и дека е оддалечена околу 30 километри од изворите „Рашче“. Според него, депонијата постои околу 30 години.

— реклама —

Тој нагласи дека, без оглед на тоа што локацијата не е под надлежност на Град Скопје, секоја депонија што претставува еколошки проблем треба да биде расчистена. ЈП „Водовод и канализација“ – Скопје, како што наведе, треба да постапи во рамките на своите надлежности, а Градот ќе даде целосна поддршка за расчистување на локацијата.

— реклама —

— реклама —

Во однос на квалитетот на водата, Ѓорѓиевски тврди дека секојдневните анализи покажуваат дека водата е безбедна за пиење. Дополнително, секој ден се земаат примероци од 36 до 40 локации низ водоснабдителниот систем, кои се испитуваат во лабораториите на ЈП „Водовод и канализација“.

— реклама —

Изворот „Рашче“, според Ѓорѓиевски, е под постојан 24-часовен надзор, со видеонадзор и физичко обезбедување на просторот околу изворот.

„Скопје има безбедна вода за пиење“, порача Ѓорѓиевски, додавајќи дека нема да премолчува доколку постои ризик по здравјето на скопјани, но и дека нема да дозволи со, како што наведува, невистини и шпекулации да се создава паника меѓу граѓаните.