Ѓорѓиевски: Драстично ги намалуваме новите вработувања во Град Скопје

Градоначалникот на Скопје, Орце Ѓорѓиевски, соопшти дека Градот ќе го намали бројот на нови вработувања во јавните претпријатија и установи.

— реклама —

Како што наведе, одлуката е донесена на денешната седница на Советот на Град Скопје, со цел да се ограничи натрупувањето на администрацијата и дополнителното оптоварување на градскиот буџет.

Ѓорѓиевски посочува дека во сите јавни претпријатија и установи се предвидуваат помалку нови вработувања, додека вкупниот број вработени, особено во јавните претпријатија, ќе биде намален по законски основи.

— реклама —

Според него, приоритет ќе имаат работниците кои директно ги обезбедуваат услугите за граѓаните, меѓу кои возачите во ЈСП, работниците и возачите во ЈП „Комунална хигиена“ и оперативниот кадар таму каде што има потреба.

— реклама —

„Најголемиот дел од предвидените нови вработувања се за луѓе кои ќе работат на терен и директно ќе им служат на граѓаните, додека административните позиции се сведени на минимум“, наведе Ѓорѓиевски.

Тој додава дека со преструктуирањето средствата и кадарот треба да се насочат кон областите кои се најпотребни за функционирањето на градот, со цел, како што вели, да се заштити буџетот и да се создадат услови за подобри услуги.

— реклама —

„Скопјани заслужуваат функционален град. Секое работно место мора да придонесува за тоа, а секој потрошен денар да биде оправдан пред граѓаните“, порача Ѓорѓиевски.