Ѓорѓиевски: Изградбата на пречистителната станица за Скопје напредува, завршени се речиси 40 отсто од работите

Градоначалникот на Скопје, Орце Ѓорѓиевски, соопшти дека изградбата на пречистителната станица за отпадни води се одвива со забрзана динамика и дека досега се завршени речиси 40 проценти од градежните работи.

— реклама —

Според него, станува збор за најголемиот и најсовремен еколошки проект во Македонија, кој опфаќа изградба на околу 60 објекти и ќе придонесе за подобра заштита на реката Вардар, животната средина и јавното здравје.

Ѓорѓиевски посочи дека проектот првично се соочил со застој поради незавршени административни процедури, неусвоени детални урбанистички планови, експропријација на земјиштето и доцнење во исплатите кон изведувачот, но дека сега работите се реализираат според предвидената динамика.

— реклама —

Тој информира дека, согласно договорот меѓу ЈП „Водовод и канализација“ – Скопје и изведувачот, градежните активности треба да завршат во првата половина на 2028 година, по што ќе следува двегодишен пробен период. Конечниот почеток на целосното функционирање на станицата е планиран за првата половина на 2030 година.

— реклама —

„Овој проект ќе значи почист Вардар, поздрава животна средина и посигурна иднина за генерациите што доаѓаат“, наведува Ѓорѓиевски.