Ѓорѓиевски на одбележувањето на 59 години МАНУ: Силата на една нација се огледува во знаењето што го создава и културата што ја негува

Македонската академија на науките и уметностите (МАНУ) одбележа 59 години од своето основање, а на свеченоста присуствуваше и градоначалникот на Скопје, Орце Ѓорѓиевски, кој ја истакна значајната улога на институцијата во развојот на македонската наука, култура и национален идентитет.

Ѓорѓиевски присуствуваше на настанот на покана на претседателот на МАНУ, академик Живко Попов. Тој нагласи дека знаењето, културата и наследството што се остава на идните генерации се меѓу најважните обележја на една нација.

— реклама —

„Силата на една нација се огледува во знаењето што го создава, културата што ја негува и наследството што им го остава на идните генерации. Токму затоа, МАНУ има посебно место во нашиот национален и општествен развој“, истакна Ѓорѓиевски.

— реклама —

Градоначалникот посочи дека му претставувало особено задоволство да биде меѓу истакнати претставници на научната мисла од Македонија и регионот, со кои разговарал за прашања поврзани со иднината на Скопје. Според него, нивното знаење, искуство и визија можат да придонесат во создавањето град што се развива, го почитува своето наследство и отвора нови можности за идните генерации.

Тој оцени дека МАНУ со децении претставува столб на научното и уметничкото творештво, како и на интелектуалниот и духовниот развој на Македонија. Со својот авторитет и интегритет, Академијата има значајна улога во проучувањето, афирмацијата и зачувувањето на македонскиот јазик, култура и идентитет, но и во унапредувањето на меѓусебното почитување и соживотот меѓу заедниците.

— реклама —

Како конкретен придонес кон уредувањето на просторот околу институцијата, Ѓорѓиевски информираше дека Град Скопје започнал со хортикултурно уредување на околината на МАНУ.

„Почитта кон ваквите институции ја покажуваме и преку конкретна грижа. Како Град Скопје, започнавме со хортикултурно уредување на просторот околу МАНУ, за ова значајно средиште на знаењето и творештвото да добие поубаво и поуредено опкружување, достојно на неговото значење“, истакна градоначалникот.

По повод годишнината, Ѓорѓиевски упати честитки до Соња Должан од Словенија, овогодишната добитничка на меѓународното признание „Блаже Конески“, посакувајќи ѝ уште многу успеси и нови творечки достигнувања. Честитки упати и до сите членови и соработници на МАНУ, изразувајќи почит кон нивната работа и придонес.