Ѓорѓиевски најави продолжување на големата еко-акција во Скопје: Ќе се чисти на повеќе од 50 локации

Градоначалникот на Скопје, Орце Ѓорѓиевски, најави продолжување на големата еколошка акција за чистење на главниот град, во која повторно ќе се вклучат илјадници волонтери, општините, ученици и граѓани од сите генерации.

Според најавата на Ѓорѓиевски, акцијата ќе се одржи во среда, со почеток во 10 часот, а чистењето ќе се организира на повеќе од 50 локации низ скопските општини. Ќе се чистат паркови, улици, пешачки патеки, јавни површини и простори меѓу станбените згради.

— реклама —

„Силата на Скопје е во неговите луѓе. Во оние што ќе излезат од својот дом за да го направат поубав и заедничкиот. Во рацете што чистат, во свеста што се буди, во решителноста да оставиме нешто добро зад себе“, порача Ѓорѓиевски.

Тој ги повика скопјани да се приклучат на акцијата и заеднички да придонесат за почиста, поубава и поздрава животна средина. Во активностите ќе учествуваат општините и градоначалниците, учениците, волонтерите и граѓаните.

— реклама —

За точните локации и начинот на приклучување, граѓаните треба да се информираат во своите општини.

— реклама —

Ѓорѓиевски најави дека ваквите акции ќе продолжат да се организираат двапати месечно, како што било претходно ветено, со цел грижата за јавните површини да стане редовна навика.

Градоначалникот нагласи дека, покрај обврската на институциите за одржување на чистотата, и граѓаните имаат одговорност да го чуваат градот.

„А секој што несовесно фрла отпад и создава депонии мора да понесе одговорност за своите постапки. Нечија неодговорност не смее да го поништува трудот на илјадници луѓе!“, порача Ѓорѓиевски.

„Да оставиме пример, не ѓубре!“, е пораката со која градоначалникот ги повика скопјани повторно да се обединат во акцијата за почист град.