Околу 30.000 граѓани денеска се вклучија во голема акција за чистење на Скопје, во која учествуваа жители од повеќе делови на градот, градоначалници, претставници на амбасади, јавни личности, млади и волонтери.
Учесниците со заеднички ангажман чистеа јавни површини, паркови, населби и други локации, со цел да придонесат за почиста и поуредна животна средина. Акцијата беше насочена и кон поттикнување на поголема граѓанска одговорност и создавање навики за редовно одржување на јавните простори.
Од акцијата беше испратена порака дека грижата за животната средина е заедничка одговорност и дека секој поединец може да придонесе за почист и побезбеден простор. Беше упатен и апел до граѓаните да го почитуваат вложениот труд и да се грижат за чистотата на улиците, парковите и другите јавни површини.
Организаторите најавија дека вакви акции ќе продолжат да се одржуваат двапати месечно, со цел грижата за градот да стане трајна навика.
Тие им се заблагодарија на сите граѓани, волонтери, институции, јавни личности и претставници на дипломатскиот кор кои се приклучија на акцијата и придонесоа кон уредувањето на јавниот простор.
