Скопје ќе добие нова, модерна противпожарна станица, откако на денешната седница на Советот на Град Скопје, преку ребалансот на буџетот, беа обезбедени 50 милиони денари за реализација на проектот, информирање Градоначалникот Орце Ѓорѓиевски.
Градоначалникот Орце Ѓорѓиевски информираше дека новиот објект ќе биде изграден во општина Аеродром, во близина на Центарот за јавно здравје, и треба да овозможи подобра организација на работата, побрза реакција и поголема безбедност за граѓаните.
„Пожарникарите се хероите на нашиот град. Тие секојдневно го ризикуваат својот живот за да спасуваат луѓе и имот, затоа заслужуваат современи услови за работа, модерна опрема и достоинствена инфраструктура“, порача Ѓорѓиевски.
Според него, изградбата на новата противпожарна станица ќе придонесе за поефикасни интервенции при пожари и технички спасувања, како во урбаните средини, така и на отворен простор.
Ѓорѓиевски им се заблагодари на советниците кои го поддржаа проектот, оценувајќи дека станува збор за инвестиција од големо значење за безбедноста на сите скопјани.
