Градоначалникот на Скопје, Орце Ѓорѓиевски, најави реализација на проект за изградба на зелени коридори долж булеварите и главните градски улици, со цел, како што наведе, да се создаде почиста и поздрава урбана средина.
Според Ѓорѓиевски, денеска започнало уредувањето на зелен коридор долж улицата „Ѓорче Петров“, каде што паралелно се реконструира и пешачката патека во должина од околу четири километри.
Тој истакна дека проектот предвидува засадување нови дрвја, дополнително зеленило и уредување на јавните површини, со што ќе се овозможат подобри услови за пешаците и поквалитетен јавен простор.
Ѓорѓиевски најави дека вакви зелени коридори ќе се градат и во другите делови на градот, оценувајќи дека тие придонесуваат за намалување на загадувањето, ублажување на високите температури и создавање природна сенка.
„Скопјани заслужуваат чист, зелен и уреден град, во кој секоја населба ќе добие ново зеленило, а секој граѓанин ќе почувствува дека Скопје навистина се менува на подобро“, порача Ѓорѓиевски.
