Ѓорѓиевски: Почнува санација на улици и водовод во Кисела Вода и Шуто Оризари

Градоначалникот на Град Скопје, Орце Ѓорѓиевски, информираше дека на денешната седница на Советот на Град Скопје била изгласана меѓуопштинска соработка со општините Кисела Вода и Шуто Оризари, со што ќе започне реализација на повеќе инфраструктурни проекти.

— реклама —

Според него, во општина Кисела Вода ќе се изврши пробивање, односно продолжување на улицата „Димо Хаџи Димов“ до кружниот тек, проект за кој рече дека ќе придонесе за подобро сообраќајно поврзување, поголема безбедност и намалување на сообраќајниот метеж.

Во општина Шуто Оризари, пак, ќе се реализира санација на улицата „Македонско-косовска бригада“ 38, главната улица во населеното место Горно Оризари, како и на улицата „37“, каде што е предвидено и подобрување на водоводната мрежа.

— реклама —

Ѓорѓиевски истакна дека со овие активности се исполнуваат ветувања дадени пред граѓаните и се подобруваат условите за живот во делови од градот кои, како што наведе, со години чекале на инфраструктурни инвестиции.

— реклама —

Тој порача дека Град Скопје ќе продолжи со рамномерен развој на сите општини и населени места, најавувајќи дека во наредниот период ќе следуваат нови проекти низ целиот град.