Ѓорѓиевски: Скопје го има најдобриот прв квартал , за 4,5 месеци намалени се обврските на јавните претпријатија за 38,5 милиони евра

Градоначалникот на Скопје, Орце Ѓорѓиевски,преку објава на социјалните мрежи соопшти дека градот го бележи „најдобриот прв квартал во својата историја“ во однос на реализацијата на капиталните инвестиции.

— реклама —

Според Ѓорѓиевски, во Основниот буџет на Град Скопје за 2026 година биле планирани капитални инвестиции во износ од 1,85 милијарди денари, што претставува зголемување од 32,4 проценти во споредба со 2025 година.

Тој наведе дека во првиот квартал биле реализирани 335,75 милиони денари, односно 18,12 проценти од планираните капитални инвестиции, што, според него, е најдобар резултат досега.

— реклама —

„Ова е резултат на дисциплина, работа, одговорност и секојдневна борба за секој денар да биде насочен таму каде што најмногу им треба на граѓаните“, истакна Орце Ѓорѓиевски.

— реклама —

Тој додаде дека само во април биле реализирани капитални инвестиции во износ од 464,45 милиони денари, што е највисока априлска реализација досега, а заклучно со 8 мај 2026 година биле реализирани повеќе од 480 милиони денари, односно 26 проценти од планираните капитални инвестиции.

Ѓорѓиевски информираше и дека за 4,5 месеци обврските на јавните претпријатија биле намалени за околу 38,5 милиони евра, при што најголемо намалување има кај ЈП „Водовод и канализација“.

Според него, намалени се и обврските на Град Скопје за околу 11,6 милиони евра, а исплатени биле и долгови за експропријација, субвенции и судски обврски.