Градоначалникот на Скопје Орце Ѓорѓиевски преку објава на социјалните мрежи информираше за своето присуство на промоцијата на книгата „The Skopje Project“, одржана во рамки на Меѓународната конференција со која официјално започна проектот „Скопје – Европска престолнина на културата 2028“.
Автор на делото е проф. д-р Огнен Марина, а книгата, како што наведува Ѓорѓиевски, го истражува Скопје не само како град обновен по голема трагедија, туку и како исклучителен меѓународен проект реализиран под покровителство на Обединетите нации и со поддршка од речиси деведесет држави.
Според неговата објава, Скопје во ова дело се прикажува како симбол на меѓународна солидарност, каде што архитектурата, урбанизмот, политиката и дипломатијата се преплетуваат во обид за создавање современ и хуман град.
Ѓорѓиевски посочува дека книгата ја следи сложената приказна за големите визии и нивните ограничувања, како и улогата на истакнати архитекти и урбанисти како Ернест Вајсман, Константинос Доксијадис, Јап Бакема и Кензо Танге. Скопје, како што се наведува, во тој период станува своевидна лабораторија за модерна архитектура и урбанистичко планирање, позиционирана меѓу Истокот и Западот.
Градоначалникот истакнува дека значењето на оваа книга е исклучително, бидејќи потсетува дека Скопје има историја која надминува локални рамки и претставува дел од европското и светското наследство. Тој нагласува дека градот бил место каде светот вложил знаење, солидарност и надеж.
Во контекст на подготовките за „Скопје 2028“, Ѓорѓиевски оценува дека културата не претставува само збир на настани, туку и сила што влијае врз начинот на кој градот се разбира, планира и живее. Како што обновата по земјотресот го поставила Скопје на светската мапа на солидарноста, така и овој проект се гледа како можност за нова урбана трансформација заснована на култура, знаење и соработка.
На крајот од објавата, тој му честита на авторот за делото и изразува надеж дека „The Skopje Project“ ќе поттикне нови читања, дебати и идеи за иднината на градот.
