Ѓорѓиевски: Влогот во младите е влог во иднината на Македонија

Орце Ѓорѓиевски денеска на својот фејсбук профил порача дека вложувањето во младите претставува вложување во иднината на Македонија, на отворањето на „Националниот натпревар на вештини 2026“, организиран од Занаетчиска комора Скопје.

На настанот присуствувале и Михалис Рокас и Весна Јаневска.

— реклама —

Ѓорѓиевски истакна дека Град Скопје со гордост застанал зад проектот преку кофинансирање, препознавајќи ја неговата важност за развојот на стручното образование и создавањето квалитетни млади кадри.

Годинава, натпреварот обединува ученици од десет стручни училишта од Скопје и уште 50 училишта од целата држава, кои ќе ги покажат своите знаења и практични вештини во 15 стручни профили од областа на занаетчиството.

— реклама —

„Ова не е само натпревар, туку потврда дека стручното образование има огромна вредност. Практичните вештини отвораат врати кон сигурна професија, личен развој и достоинствен живот“, порача Ѓорѓиевски.

— реклама —

Тој додаде дека младите заслужуваат пристап до европски знаења, стандарди и перспективи, нагласувајќи дека визијата е да се создаде општество во кое младите ќе останат, ќе создаваат и ќе ја градат својата иднина во државата.

Ѓорѓиевски најави дека Град Скопје и во иднина ќе продолжи да го поддржува настанот преку програмите за локален економски развој и преку Стратегијата за развој на занаетчиството 2025–2028, изработена во соработка со Занаетчиската комора Скопје.