Градоначалникот на Скопје, Орце Ѓорѓиевски, од Израел порача дека главниот град мора да стане помодерен, пофункционален и подобро подготвен за справување со кризни ситуации, истакнувајќи дека посетата на конференцијата MUNI EXPO 2026 има цел да донесе конкретни решенија што ќе го подобрат животот на граѓаните.
Тој нагласи дека во Израел дошол со намера да учи од искуствата на локалните власти кои се стекнати во реални и сложени околности, додавајќи дека најголем интерес има за подобра координација меѓу институциите, управување со кризи, паметни технологии, сообраќај, јавна безбедност, управување со отпадот и водните ресурси.
Според Ѓорѓиевски, израелските градови покажуваат дека локалната власт мора да биде подготвена уште пред да се случи кризата, а не да импровизира кога веќе е предоцна. Како главен град, Скопје, рече тој, мора да изгради систем што ќе може брзо да реагира при пожари, природни непогоди, загадување, сообраќајни колапси и сајбер-закани.
Говорејќи за иднината на европските градови, градоначалникот оцени дека најголемите предизвици ќе бидат мобилноста, загадувањето, инфраструктурата, безбедноста и квалитетот на живот. Според него, целта е Скопје да стане почист, позелен и подобро организиран град.
„Не верувам во големи зборови без реализација. Верувам во ред, работа и конкретни резултати“, истакна Ѓорѓиевски.
Тој не ја исклучи можноста за збратимување на Скопје со некој израелски град, нагласувајќи дека таквата соработка треба да биде насочена кон размена на искуства, заеднички проекти и примена на успешни практики во областите на иновациите, безбедноста, управувањето со водите и паметните технологии.
Осврнувајќи се на својата работа како градоначалник, Ѓорѓиевски рече дека најголем предизвик по преземањето на функцијата било враќањето на редот и довербата во институциите, оценувајќи дека Скопје е комплексен систем со различни потреби и очекувања.
Тој нагласи дека Скопје има голем потенцијал, природни убавини, богато културно наследство и гостопримливост, но дека во наредниот период приоритет ќе бидат почистите улици, подобриот јавен превоз, повеќе зеленило и поквалитетната инфраструктура.
Во интервјуто се осврна и на односите меѓу Македонија и Израел, оценувајќи дека постои значителен простор за продлабочување на соработката меѓу градовите, особено во областа на дигиталните услуги, паметното управување со сообраќајот, енергетската ефикасност и иновациите.
Ѓорѓиевски ја осуди и секоја форма на антисемитизам, осврнувајќи се на неодамнешниот обид за подметнување пожар во Еврејскиот културен центар и синагогата во Скопје. Тој порача дека таквите напади се удар врз вредностите на градот и дека Скопје мора да остане место во кое сите граѓани ќе се чувствуваат безбедно и еднакво.
На крајот, градоначалникот истакна дека неговата цел е по завршувањето на мандатот граѓаните да можат да кажат дека Скопје повторно станало град со ред, достоинство и јасна насока.
„Не сакам да бидам запаметен по големи зборови, туку по работа што луѓето ќе ја почувствуваат – почист град, подобар јавен превоз, уредени паркови, поголема безбедност и институции поблиску до граѓаните“, порача Ѓорѓиевски.
