Градоначалникот на Град Скопје, Орце Ѓорѓиевски, изрази благодарност до Владата, премиерот и Министерството за култура за, како што рече, ангажманот околу започнувањето на изградбата на Универзалната сала во Скопје.
„Во име на Скопје сакам да се заблагодарам на претседателот на Владата, на Владата, како и на Министерството за култура и туризам и министерот Љутков за ангажманот со кој по долги години повторно се враќа душата на Скопје – Универзалната сала“, изјави Ѓорѓиевски.
Тој нагласи дека во минатото имало само декларативни најави, без конкретна реализација, додека сега, како што рече, започнува реален процес на обнова на објектот.
„Овој објект ќе биде репрезентативен за градот и државата, симбол од постземјотресниот период кој буди емоции кај сите скопјани“, додаде тој.
Градоначалникот појасни дека реализацијата на проектот ја води Владата преку Министерството за култура и туризам, а Град Скопје ќе ја преземе Универзалната сала по нејзиното завршување, при што ќе обезбедува логистичка поддршка во текот на изградбата.
Ѓорѓиевски се осврна и на работата на новото градско раководство, наведувајќи дека се постигнуваат резултати во повеќе области, меѓу кои хигиената, одржувањето на зеленилото и реорганизацијата на јавните претпријатија.
Тој најави и активности во делот на водоводниот систем, посочувајќи дека дел од мрежата е дотраена и предизвикува загуби на вода.
„Работиме систематски на замена на инсталациите и намалување на загубите. Имаме најквалитетна вода, но инфраструктурата е застарена“, рече тој.
Според него, во тек се активности за изградба на бунари и подобрување на системите за техничка вода, со цел питката вода да не се користи за наводнување и други несоодветни намени.
Градоначалникот најави и субвенции за домаќинствата во периферните делови на Скопје, како дел од мерките за поефикасно управување со водните ресурси.
Во однос на безбедносни прашања, Ѓорѓиевски посочи дека одредени премини, кои досега биле предмет на дискусија меѓу граѓаните, нема да бидат легализирани доколку претставуваат ризик, нагласувајќи дека безбедноста на пешаците и учесниците во сообраќајот е приоритет.
