Сериозни технички недостатоци биле утврдени при деталната проверка на скопската жичница, која ја извршила австриската компанија „Допелмаер“. Според извештајот што го презентираше скопскиот градоначалник Орце Ѓорѓиевски, носечките и влечните сајли биле оштетени и под дозволениот безбедносен минимум, додека три од четирите сензори за движење на кабините не функционирале.
Ѓорѓиевски во телевизиско интервју посочи дека ваквата состојба била причина жичницата веднаш да биде исклучена од сообраќај.
„Во Швајцарија имало несреќа пред неколку години, во која, за жал, загинала госпоѓа. Несреќата се случила поради нефункционалност на еден од четирите сензори за движење на кабините. Кај нас, три од четири не функционираа“, изјави тој.
Со „Допелмаер“ веќе е склучен договор за целосна ревитализација на системот, а наскоро се очекува на терен да пристигнат стручни тимови од компанијата, заедно со оригинални делови.
По завршувањето на техничките зафати, жичницата ќе биде подложена на темелни тестирања, по што треба да добие официјален меѓународен сертификат за сигурност. Предвидена е и дополнителна обука на вработените кои ќе ги вршат редовните сервиси и проверки.
Ѓорѓиевски најави дека првото тест-возење по повторното пуштање во употреба ќе го направи лично, заедно со директорот на ЈСП „Скопје“ и со своите деца.
Целосната реконструкција треба да заврши до крајот на ноември, по што жичницата повторно ќе биде ставена во функција за скопјани и туристите во претстојната зимска сезона. И натаму ќе има прекини во работата во деновите со силен ветер.
Покрај жичницата, Ѓорѓиевски најави и воведување интегриран билет за железничкиот и автобускиот јавен превоз. Според најавите, до средината на идната година патниците би требало со еден билет да можат да комбинираат воз и автобус, без дополнително плаќање при преминување од еден во друг вид превоз.
Системот треба да се изработи во соработка со Министерството за транспорт, а како пример Ѓорѓиевски ја посочи можноста патник да се качи во Зелениково и со еден билет да продолжи до Ѓорче Петров.
Во меѓувреме се придвижува и проектот за брз автобуски превоз, БРТ. Во наредните денови треба да биде објавена тендерската постапка за проектирање и изградба, во координација со Европската банка за обнова и развој. Ако постапката се одвива според планот, градежните работи би започнале кон крајот на пролетта 2027 година.
Планирано е БРТ да го поврзе Ѓорче Петров со Аеродром, а проектот опфаќа и набавка на дополнителни 40 еколошки автобуси. Предвидено е автобусите да сообраќаат со фреквенција со која патниците би чекале помалку од шест минути.
Во делот на отпадот, градоначалникот најави можност граѓаните еден или два дена месечно бесплатно да го оставаат кабастиот отпад на „Дрсла“. Се разгледува и можноста за парични награди за граѓаните кои ќе пријавуваат неправилно фрлање отпад.
Предлог-мерките треба да бидат разгледани од Советот на Град Скопје на наредните седници.
Паралелно, во завршна фаза е и постапката за поставување камери на повеќе од 200 локации во градот, особено на места каде што се создаваат диви депонии, како и во паркови и детски игралишта.
Според Ѓорѓиевски, снимките од случаи на вандализам ќе бидат доставувани до Министерството за внатрешни работи, со цел сторителите да сносат одговорност.
