Го победи Ѓоковиќ, па порача: „Ова е најголемата победа во мојата кариера!“

Аргентинецот Тијаго Агустин Тиранте приреди големо изненадување на Мастерсот во Синсинати, совладувајќи го Новак Ѓоковиќ со 2:6, 6:4, 6:4. За Тиранте тоа е најголемата победа во досегашната кариера.

Ѓоковиќ одлично го започна мечот и го освои првиот сет, но потоа имаше сериозни физички проблеми во услови на висока температура и влажност. Побара медицинска помош, а во еден момент изгледаше дека едвај продолжува со играта. Тиранте, сепак, остана смирен и ја искористи шансата за една од најзначајните победи во кариерата.

— реклама —

„Мислам дека ова е најголемата победа во мојата кариера. Навистина добро си ја завршив работата на теренот. Одлично се справив со тремата, играјќи против легенда како Новак“, изјави Аргентинецот по мечот.

Особено го истакна моментот кога не успеваше да ги искористи шансите за брејк и мораше да остане ментално силен.

— реклама —

„Имав толку многу брејк-топки, но не можев да направам брејк. Клучно беше да продолжам да верувам во себе и во мојот тим“, рече Тиранте.

— реклама —

Емоциите по победата беа големи, а тенисерот мислеше и на семејството и пријателите кои го следеле мечот од Аргентина.

„Размислувам за моето семејство и пријателите кои се во Аргентина и ме гледаат. Тие се навистина среќни што ме гледаат на телевизија. Тие се во Аргентина, но се и во моите мисли“, порача Тиранте.

Аргентинецот сега продолжува во третото коло, каде што ќе игра против Шпанецот Мартин Ландалусе.

Тиранте посочи дека голем удел во неговиот напредок има самодовербата што ја стекнал со својот тим и работата со ментален тренер.