Во пожар што избувнал во текот на ноќта во станбено-деловна зграда во швајцарскиот град Тузис, се трага по пет лица, додека осум луѓе се повредени. Објектот, во кој имало ресторан и станбени простории, целосно изгорел, соопшти полицијата во кантонот Граубинден.
Пожарот бил пријавен нешто по полноќ, по што на местото биле испратени речиси 100 пожарникари. Интервенцијата била особено сложена бидејќи скалиштето во зградата се урнало, па пожарникарите морале, со помош на специјална платформа, да го пробијат покривот за да стигнат до внатрешноста на објектот.
И покрај тешките услови, спасувачите успеале да извлечат 14 лица од зградата.
Од осумте повредени, две лица се здобиле со тешки повреди, две со повреди со средна тежина, додека четворица поминале со полесни повреди. Сите биле пренесени во болници во Хур, Тузис, Иланц и Цирих.
Првичните наоди покажуваат дека пожарот избувнал на вториот кат, но точната причина сè уште не е утврдена. Случајот го истражуваат полицијата и надлежното обвинителство.
Тузис се наоѓа во алпскиот кантон Граубинден, во источниот дел на Швајцарија, регион познат по планинскиот туризам и зимските спортови.
