Во англиската грофовија Сафок е прогласена вонредна состојба поради голем шумски пожар што избувна во областа Данвич Хит, во близина на градот Лејстон. Во исто време, речиси половина од Англија се соочува со сериозна суша, соопштија британските власти.
Пожарот избувнал во средата попладне, а во неговото гаснење се вклучени околу 90 пожарникари. Според Противпожарно-спасувачката служба на Сафок, вонредната состојба е прогласена поради големиот обем и сложеноста на интервенцијата, додека силниот ветер дополнително го поттикнува ширењето на огнената стихија кон југозапад.
На жителите им е препорачано да го избегнуваат погоденото подрачје и да ги држат затворени прозорците и вратите поради густиот чад.
Пожарот избувна само неколку часа откако Сафок беше ставен на листата региони во кои официјално е прогласена суша. Освен оваа грофовија, мерката се однесува и на Источна Англија, Хертфордшир, Лондон, долината на Темза, Хемпшир, Островот Вајт, Девон, Корнвол, Западен Мидлендс и Весекс.
Британската Агенција за животна средина соопшти дека продолжените високи температури и рекордно ниското количество врнежи се главните причини за актуелната состојба. Според проценките, не се очекуваат доволно врнежи за значително подобрување пред есен, најверојатно до октомври.
Поради недостигот од вода, ограничувања за користење црева за наводнување веќе се воведени за околу 23 милиони корисници.
Температурите повторно надминаа 30 степени Целзиусови, а метеоролозите предупредуваат дека јули би можел да биде еден од најсувите месеци откако се води евиденција.
Британската Агенција за здравствена безбедност издаде жолто предупредување за високи температури за делови од Англија, кое останува во сила до четврток наутро.
Во местото Лингвуд, во Норфолк, беше измерена температура од 38 степени Целзиусови, што претставува најтопол јунски ден досега регистриран во Велика Британија.
Министерката за водостопанство Ема Харди предупреди дека земјата мора да се подготви за „нова нормалност“, оценувајќи дека климатските промени носат сè почести и поинтензивни суши. Ова е трета прогласена суша во Велика Британија во последните пет години.
Покрај пожарот во Сафок, пожарникарите интервенираа и на повеќе други локации низ земјата. Во Шкотска е постигнат напредок во гаснењето на големиот пожар во националниот парк Кернгормс, кој трае веќе две недели, додека во Ромфорд избувна пожар на тревна површина. Од шкотската противпожарна служба предупредуваат дека опасноста од нови пожари останува многу висока, а досегашните пожари веќе предизвикале сериозни последици врз локалниот животински свет.
