Голема истрага за финансиски криминал: Осомничени 18 лица и осум компании

Основното јавно обвинителство за гонење на организиран криминал и корупција отвори истражна постапка против 18 физички и осум правни лица поради сомнежи за проневера во службата и перење пари во Фудбалската федерација на Македонија (ФФМ).

Во координирана акција спроведена од истражителите на ОЈО ГОКК, Министерството за внатрешни работи и Управата за финансиска полиција, приведени се 12 лица, додека петмина засега се недостапни за органите на прогонот.

— реклама —

Според Обвинителството, под истрага се двајца поранешни претседатели на ФФМ, раководителката на Одделението за финансии и сметководство, раководителот на Одделот за судии и судење, како и 14 управители, сопственици и овластени лица во правни субјекти. Осум компании исто така се опфатени со постапката.

— реклама —

Истрагата покажала дека во периодот од 2015 до 2019 година, преку повеќе дејствија и со претходен договор, биле присвоени средства доверени на управување во ФФМ. Според сомнежите, првиот поранешен претседател на Федерацијата заедно со раководителката на финансии присвоил над 127 милиони денари, додека вториот поранешен претседател во наредниот период присвоил повеќе од 53 милиони денари.

Обвинителството наведува дека финансиската раководителка вршела манипулации во сметководствената евиденција со цел да ги прикрие исплатите кон повеќе правни лица, преку измена на книговодствени налози и прикривање на вистинската основа на плаќањата.

— реклама —

Двајцата поранешни претседатели, иако биле одговорни за законито и транспарентно користење на средствата, одобриле и потпишале вкупно 728 налози за исплата без целосна финансиска документација и без проверка на нивната оправданост, со што, според истрагата, на ФФМ ѝ била нанесена штета од 180.802.365 денари.

Осомничените управители и сопственици на фирми, пак, издавале фактури со невистинита содржина за наводно извршени услуги и испорачана стока, врз основа на кои биле вршени исплатите. Потоа средствата биле пуштани во финансискиот промет со цел да се прикрие нивното незаконско потекло.

За десетмина осомничени Обвинителството ќе побара мерка притвор, за седум лица ќе предложи други мерки за обезбедување присуство, додека еден од осомничените веќе се наоѓа во притвор во рамки на друга постапка.