Ѝ се заканувал дека ќе ја убие сопругата ако не го промени исказот за претходното семејно насилство

Основното јавно обвинителство Тетово поведе постапка против 50-годишен маж осомничен за кривичното дело „Загрозување на сигурноста“, сторено при семејно насилство, а до надлежниот суд е доставен и предлог за определување мерка притвор.

— реклама —

Според Обвинителството, осомничениот на 20 јули ѝ се заканувал на својата сопруга во обид да ја натера да го промени исказот што требало да го даде пред Обвинителството во врска со претходна пријава за семејно насилство.

— реклама —

Тој барал од неа да изјави дека претходниот инцидент не се случил и дека живеат заедно без никакви проблеми. Откако дознал дека таа останала на претходната изјава, телефонски ѝ се заканил дека ќе ја убие, поради што жената не се вратила во семејниот дом.

— реклама —

Според ОЈО, осомничениот потоа отишол на нејзиното работно место, каде што пред нејзиниот претпоставен викал дека не смее да работи таму и повторно упатувал закани по нејзиниот живот. Подоцна ги повторил заканите и пред родителите на оштетената, предизвикувајќи кај неа чувство на страв, несигурност и загрозеност.

Поради околностите на случајот, јавниот обвинител до надлежниот суд доставил предлог за определување мерка притвор за осомничениот.