Пет лица се уапсени во Србија во продолжение на полициската акција „Армагедон“, поради сомнение дека сториле кривични дела поврзани со сексуална експлоатација на деца преку интернет и сексуално вознемирување. Против уште едно лице е поднесена кривична пријава во редовна постапка, соопшти српското Министерство за внатрешни работи.
Уапсените се од Белград, Прокупље, Суботица и Сремска Митровица, а се сомничат дека подолг период преку интернет-апликации преземале, чувале и споделувале фотографии и видеозаписи со сексуална злоупотреба на деца.
Според полицијата, дел од осомничените користеле лажни профили на социјалните мрежи за да стапуваат во контакт со малолетни лица, да им испраќаат недозволени содржини и да прибавуваат материјали со нивна сексуална експлоатација.
При претресите на домовите, како и при проверката на компјутери и друга електронска опрема, биле пронајдени поголем број фотографии и видеозаписи, како и пораки со сексуална содржина за кои постои сомнение дека биле користени за вознемирување на деца и малолетни лица.
Полицијата посочува дека кај едно од уапсените лица, кое користело лажни профили, биле пронајдени материјали и комуникации со повеќе малолетни лица од Србија. Во еден случај, осомничениот наводно стапил во контакт со дете и побарал од него експлицитни фотографии.
Петтемина уапсени се задржани до 48 часа и со кривични пријави ќе бидат изведени пред надлежното обвинителство, додека за уште едно лице постапката ќе се води во редовна постапка.
Министерот за внатрешни работи во технички мандат, Ивица Дачиќ, нагласи дека зад секоја фотографија или видеозапис со сексуална експлоатација стои дете кое претрпело злоупотреба, а со понатамошното споделување на таквите материјали дополнително се нарушуваат неговата приватност и достоинство.
Дачиќ ги повика родителите и старателите да разговараат со децата за нивната комуникација на интернет и да ги охрабрат без страв да пријават вознемирувачки пораки или барања за интимни фотографии. Тој апелираше сомнителните содржини да не се проследуваат до други лица, туку веднаш да се пријават во полиција.
Акцијата ја спровеле припадници на српското МВР, Управата за техника и Службата за борба против високотехнолошкиот криминал, по налог на Вишото јавно обвинителство во Белград, во соработка со повеќе полициски управи и Управата за гранична полиција.
