Голема зделка во воздухопловството: Индиски авиопревозник преговара за купување 100 бразилски авиони

Водечкиот индиски авиопревозник „ИндиГо“ (IndiGo) е во почетна фаза на преговори за купување 100 авиони од бразилскиот производител „Ембраер“ (Embraer), наменети за регионални летови, со можност за набавка на дополнителни околу 50 авиони, изјавиле за „Ројтерс“ три извори запознаени со разговорите.

Доколку договорот биде склучен, нарачката од Индија би можела да биде една од најголемите што „Ембраер“ ги реализирал во сегментот на комерцијални авиони, оценува „Ројтерс“.

— реклама —

Ниту „ИндиГо“, ниту „Ембраер“ веднаш не одговориле на барањето на „Ројтерс“ за коментар.

Договорот меѓу „ИндиГо“ и „Ембраер“ сè уште не е сигурен, изјавиле две лица кои сакале да останат анонимни, додавајќи дека сè уште не се утврдени ниту точниот модел на авионот, ниту конечниот број на авиони што ќе бидат нарачани.

— реклама —

Според нив, испораките најверојатно би започнале кон крајот на деценијата, а можеби и подоцна.

Доколку се реализира договорот, само 100-те нарачани авиони, според официјалните ценовници, би можеле да чинат милијарди долари, иако попустите се вообичаена практика при ваквите договори, наведува „Ројтерс“.

„Ембраер“ веќе извесно време се обидува да им продаде помали патнички авиони на индиските авиопревозници.

— реклама —

Така, бразилската компанија оваа година потпиша необврзувачки договор со компанијата „Адани Дифенс енд Аероспејс“ (Adani Defence & Aerospace) за можна изградба на производствена линија за финално склопување на авионите од моделот E175 во Индија. Овие авиони можат да превезат до 88 патници.

Бразилската компанија произведува и поголеми модели – E190-E2 и E195-E2, со капацитет до 114, односно до 146 патници.

— реклама —

На почетокот на октомври, бразилскиот гигант објави дека во периодот од јануари до септември им испорачал на клиентите вкупно 52 комерцијални авиони од моделите E175, E190-E2 и E195-E2, што е за 13 отсто повеќе во споредба со истиот период минатата година.

Во текот на целата година „Ембраер“ планира да испорача од 80 до 85 авиони, покажува извештајот.