(Видео) Хеликоптер со шест лица исчезна од радарот во Индија, се стравува дека се урнал во планина

Хеликоптер со шест лица, меѓу кои петмина аџии и пилот, исчезнал за време на летот од Бадринат кон Дехрадун, во индиската сојузна држава Утараканд. Се претпоставува дека леталото се урнало во планинскиот предел во близина на Џошимат, а спасувачките екипи трагаат по него. Засега нема информации дали има преживеани.

Според првичните информации, хеликоптерот полетал во петокот попладне од хиндуистичкото аџилачко место Бадринат, и покрај снежните врнежи. Леталото изгубило комуникација додека летало над долината Џошимат, а истовремено престанал да работи и системот за следење, поради што неговата точна локација сè уште не е позната.

— реклама —

Хеликоптерот на компанијата „Транс Барат Авејшн“, со ознака VT-HCX, летал на линијата од Бадринат до Сахастрадхара во Дехрадун, а полетал околу 13:14 часот. Сите шест лица во леталото биле мажи.

— реклама —

Во регионот во текот на денот имало обилни врнежи од дожд и слаба видливост. Во сила е портокалово метеоролошко предупредување поради можни грмотевични невремиња и град.

Во потрагата е вклучена и војската. Главниот министер на Утараканд, Пушкар Синг Дами, соопшти дека се спроведува голема спасувачка операција и дека постојано ја следи состојбата.

Во последните десет години во Утараканд се регистрирани најмалку 12 инциденти со хеликоптери. Пет завршиле со смртни последици, додека во останатите седум станувало збор за принудни слетувања или несреќи во кои имало повредени. Во јуни 2025 година загинале седум лица при пад на хеликоптер со аџии во близина на Кедарнат, а уште седуммина ги загубиле животите во несреќа на истата аџилачка маршрута во октомври 2022 година.

— реклама —

Во меѓувреме, во Босна и Херцеговина се случи и несреќа со италијански воен хеликоптер во Брчко, при што загинаа четворица припадници на италијанската војска, а 11 лица беа повредени. Хеликоптерот CH-47 се урнал за време на редовна операција во рамките на мисијата ЕУФОР „Алтеа“, а причините за несреќата сè уште се утврдуваат.

Меѓу загинатите се наредниците Симоне Руџа и Клаудио Маркези, поручникот Франко Адријано Зекило и наредничката Лаура Прокачи. Зекило и Прокачи биле припадници на Доброволниот воен корпус на Италијанскиот црвен крст.