(Видео) Најмалку шест загинати во Индија по ударот на циклонот Арнаб

Најмалку шест лица загинаа, а снабдувањето со електрична енергија и натаму е прекинато во делови од источниот брег на Индија, откако циклонот Арнаб донесе обилни врнежи и силни ветрови. Надлежните служби продолжуваат со отстранување на последиците од невремето, кое ја погоди областа во текот на вчерашниот ден.

— реклама —

Весникот „Тајмс оф Индија“, повикувајќи се на локални претставници, објави дека бројот на загинати достигнал девет, од кои дел починале од струен удар, уривање на куќи или паѓање на дрвја. Сепак, претставник на владата на индиската сојузна држава Андра Прадеш соопшти дека официјалниот број на жртви изнесува шест.

Индиската метеоролошка служба го класифицирала Арнаб како „многу силна циклонска бура“, што е третата највисока категорија. Циклонот стигнал до копното во Андра Прадеш рано вчера, при што биле оштетени најмалку 15.000 електрични столбови, соопшти главниот министер на сојузната држава, Нара Чандрабабу Наиду.

— реклама —

Снабдувањето со електрична енергија е обновено во повеќето области, но прекините продолжуваат во Конесима и Западен Годавари. Во меѓувреме, товарен брод под знамето на Маршалските Острови се насукал во близина на брегот на Андра Прадеш. Поради разбрануваното море, бродот со 20 членови на екипажот не можел да го продолжи патувањето.

— реклама —

Пред доаѓањето на циклонот, повеќе од 180.000 луѓе биле евакуирани од сојузните држави Андра Прадеш и Одиша. Поради невремето биле затворени и дел од училиштата, а откажани биле и одредени железнички и авионски линии.

Циклонот Арнаб се формирал над Бенгалскиот Залив, област во која често настануваат тропски циклони што предизвикуваат разорни невремиња долж источниот брег на Индија.