Тежок удар за заштитата на гепардите во Индија: убиен 19-месечен гепард

Млад гепард стар 19 месеци бил застрелан во централна Индија, што е прв ваков случај откако во 2022 година започна програмата за повторно населување на овој вид во земјата.

— реклама —

Животното било пронајдено повредено пред три дена во шума во сојузната држава Мадја Прадеш, надвор од Националниот парк Куно. Ветеринарите извршиле операција и отстраниле пет куршуми од неговото тело, но гепардот, означен со кодот KNG22, им подлегнал на повредите следниот ден.

Индиското Министерство за заштита на животната средина го оцени инцидентот како исклучително сериозен, а истрагата е доверена на националната управа за заштита на големите мачки, која треба да ги утврди околностите.

— реклама —

Гепардот бил прогласен за исчезнат во Индија во 1952 година, по долгогодишното намалување на популацијата поради ловот, уништувањето на живеалиштата и намалувањето на пленот. Во рамките на програмата за враќање на видот, во 2022 година од Намибија биле донесени осум гепарди во Националниот парк Куно, а во февруари 2023 година пристигнале уште 12 од Јужна Африка. Програмата, поддржана од премиерот Нарендра Моди, од самиот почеток се соочуваше со тешкотии и угинување на повеќе животни.

— реклама —

Според најновите официјални податоци, објавени на почетокот на октомври, во Индија има 60 гепарди, од кои 41 се родени во земјата. Во светот живеат околу 7.000 гепарди, главно во африканските држави Јужна Африка, Намибија и Боцвана.

Азискиот гепард е критично загрозен и денес опстојува единствено во Иран, каде што се проценува дека останале околу 50 единки. На глобално ниво, гепардот е наведен како загрозен вид на Црвената листа на Меѓународната унија за зачувување на природата.

Како најбрзо копнено животно во светот, гепардот може да достигне брзина до 112 километри на час.