По повеќе од една деценија, Македонија доби ажурирана и официјално објавена Листа на есенцијални лекови. Во неа се додадени 193 лекови и активни супстанции, додека 12 од претходната листа се избришани, соопшти министерот за здравство Сашо Клековски.
Новините денеска беа презентирани на прес-конференција на која, покрај Клековски, учествуваа и шефот на канцеларијата на Светската здравствена организација во земјава, Аким Али, и деканот на Фармацевтскиот факултет, проф. д-р Зоран Стерјев.
„По повеќе од една деценија, нашата држава има ажурирана и официјално објавена Листа на есенцијални лекови, базирана на современи стручни и јавно-здравствени принципи“, рече Клековски.
Стручната ревизија била спроведена во рамките на Националната платформа за лекови, со поддршка од СЗО и со учество на релевантни национални институции и засегнати страни. По усогласувањето со Секретаријатот за законодавство, листата е објавена во „Службен весник“.
Според Клековски, ажурирањето треба да овозможи следење на современите достигнувања и препораки во фармакотерапијата, поголем фокус на лековите од приоритетно јавно-здравствено значење, поддршка на клиничкото одлучување и стандардизираното лекување, како и подобро планирање и управување со лековите.
За првпат на Листата на есенцијални лекови се вклучени и лекови за контрацепција, како и лекови за никотинска заместителна терапија.
„Со тоа дополнително се зајакнува улогата на превенцијата во здравствениот систем, а воедно испраќаме јасна порака дека здравствената политика треба не само да лекува болест, туку и активно да го штити и унапредува здравјето на населението“, посочи министерот.
Новата листа е систематизирана во 28 терапевтски области и содржи подетално дефинирани подгрупи, фармацевтски дозирани форми, јачини и начини на употреба.
Вклучени се современи терапевтски опции за повеќе области, меѓу кои заразни заболувања, ХИВ, вирусни хепатити, онкологија, неврологија, кардиологија, како и репродуктивно и перинатално здравје.
Паралелно со проширувањето била направена и рационализација на листата од 2015 година. Отстранети се лекови кои повеќе не се определени како приоритетни во новиот терапевтски концепт, а кај дел од лековите е променета активната супстанција или формулацијата или е предвидена соодветна терапевтска алтернатива.
„Според извршената споредба, идентификувани се 12 избришани и 193 новододадени лекови/активни супстанции“, рече Клековски.
Министерот нагласи и дека Листата на есенцијални лекови не треба да се поистоветува со Позитивната листа на лекови, оценувајќи дека нејзиното ажурирање е чекор кон посовремен, поправичен и поодржлив здравствен систем.
