Соединетите Американски Држави се соочуваат со сериозен недостиг од работници во занаетчиските и техничките професии, но интересот кај младите за овие занимања повторно расте, поттикнат и од влијанието на социјалните мрежи.
Како што пренесува „Блумберг“, нова генерација инфлуенсери настојува да ја промени перцепцијата за професиите како што се заварувач, електричар, водоводџија, возач на камион и градежен работник, претставувајќи ги како добро платени и перспективни кариери.
Линдзи Ховер, позната на социјалните мрежи како „Blue Collar Barbie“, има повеќе од 160.000 следбеници, со кои секојдневно споделува содржини од работата како заварувач и автомеханичар. Во меѓувреме, возачката на камион, Клариса Ренкин, која има повеќе од 200.000 следбеници, отвори и сопствена академија за обука на возачи.
Овој тренд добива сè поголемо внимание во САД. На ТикТок веќе има повеќе од 4,7 милиони објави со ознаката #bluecollar, а ваквата содржина привлекува млади луѓе кои сè почесто го преиспитуваат традиционалниот избор на факултетско образование.
Податоците покажуваат дека интересот за овие професии навистина расте. Уписите во американските училишта за технички и занаетчиски занимања се зголемиле за речиси 20 проценти од пролетта 2020 година, додека градежните синдикати во 2025 година регистрирале рекордни 88.000 приправници.
Извршниот директор на „Енвидија“, Џенсен Хуанг, претходно оцени дека платите на водоводџиите, електричарите и градежните работници би можеле значително да пораснат во иднина, особено поради развојот на вештачката интелигенција и промените на пазарот на трудот.
Американската градежна и производствена индустрија веќе се соочува со недостиг од квалификувани работници поради стареењето на населението и заминувањето на голем број вработени во пензија, па младите кои ќе се определат за овие професии би можеле да бидат меѓу најбараните кадри на пазарот на трудот.
