Претседателката Гордана Сиљановска-Давкова упати честитка до ромската заедница по повод Меѓународниот ден на Ромите – 8 Април, нагласувајќи дека Ромите се неразделен дел од македонското општество и држава.
Во пораката, таа истакнува дека слободата, гордоста и заедништвото се суштински вредности на ромскиот идентитет, но предупредува дека реалната состојба на ромската заедница значително отстапува од формално загарантираните права.
„Нашата држава формално-правно е лидер во гарантирањето на малцинските права, но реалниот ромски живот е далеку од тие гаранции“, посочува претседателката.
Сиљановска-Давкова нагласува дека 8 Април треба да биде ден за сериозно преиспитување на квалитетот на животот на Ромите во сите сфери, апелирајќи дека не е доволно само симболично да се повикува на Шуто Оризари, туку дека е неопходно да се обезбеди достоинствен живот за ромската заедница насекаде.
Во честитката се потенцира дека Ромите се најранлива и најмаргинализирана категорија граѓани, која заслужува зголемено внимание, конкретни политики и реална заштита од институциите.
Претседателката упати желби за здравје, радост и среќа до сите припадници на ромската заедница, со порака за заедничка одговорност во унапредување на нивната положба.
