Гори „Орловото гнездо“ на Хитлер: Историскиот објект во пламен, полицијата приведе осомничен

Голем пожар го зафати историскиот објект „Орлово гнездо“ во германските Алпи, кој во времето на нацистичка Германија го користеле високи функционери на режимот, меѓу кои и Адолф Хитлер. Германската полиција привела осомничено лице и истражува дали пожарот бил намерно предизвикан.

Пожарот избувнал во петокот околу 21:50 часот, кога се активирал противпожарниот аларм во објектот познат како „Келштајнхаус“, во близина на Берхтесгаден, во јужната германска покраина Баварија.

— реклама —

На терен биле ангажирани околу 200 пожарникари и припадници на итните служби. Кога пристигнале, затекнале зграда целосно зафатена од пламен, кој се издигал високо над објектот.

Гаснењето било исклучително тешко поради непристапниот планински терен и надморската височина од 1.834 метри. Во саботата рано наутро пожарот сè уште бил активен, а на планинскиот врв паѓал снег.

Портпаролката на полицијата, Лиза Мајер, изјавила дека пристапот до објектот претставувал голем предизвик за спасувачките екипи.

— реклама —

„Во зградата може да се влезе само со тешка заштитна опрема за дишење“, објаснила таа.

Полицијата потврдила дека во близина на местото на пожарот било приведено сомнително лице, но засега не е утврдено дали е поврзано со избувнувањето на огнот. Според германскиот весник „Билд“, полициските службеници при пристигнувањето забележале мотоциклист.

— реклама —

Мотивот и причината за пожарот сè уште се непознати, а криминалистичката истрага е во тек. Во објектот немало луѓе и нема информации за повредени.

„Орлово гнездо“ е изградено во 1938 година како репрезентативна гостинска куќа за нацистичките функционери и нивните гости. Се наоѓа во алпски предел, недалеку од поранешната летна резиденција на Хитлер, позната како „Бергхоф“.

Објектот бил изграден од камен и гранит, со цел да остави впечаток врз странските дипломати. За разлика од многу други градби од тој период, ја преживеал Втората светска војна без оштетувања.

По војната бил прогласен за историски споменик, а од 1952 година во него работи ресторан. Денес е во сопственост на покраината Баварија и претставува туристичка атракција, со изложба посветена на неговата историја и нацистичкиот период.

До објектот туристите можат да пристигнат со организиран автобуски превоз, а неговата локација нуди панорамски поглед кон германските Алпи.