Русија се соочува со сè поголеми проблеми со снабдувањето со гориво, откако украинските напади со беспилотни летала сериозно ја погодија нејзината енергетска инфраструктура. Недостигот веќе се чувствува на бензинските станици низ земјата, а властите воведуваат ограничувања и повторно дозволуваат употреба на гориво со понизок квалитет.
Според податоците на апликацијата „Gdebenz“, вчера бензин можел да се најде на само 28 отсто од бензинските станици во Русија, што е значителен пад во однос на 41 отсто една недела претходно. Сервисот „Benzinmap“ наведува дека до минатата сабота ограничувања за продажба на гориво биле воведени во речиси сите региони.
Мерките вклучуваат ограничување на количината што може да ја купи еден возач, продажба преку QR-кодови, како и систем „пар-непар“. Во Москва, бензинските станици на „Газпром Нефт“ привремено ја ограничиле продажбата на 40 литри по возило, додека „Татнефт“ дозволува најмногу 50 литри бензин и 60 литри дизел. Според „Yandex Fuel“, бензинот АИ-92 во главниот град вчера бил достапен на само една од десет бензински станици.
Главната причина за кризата се серијата украински напади со дронови врз руските нафтени постројки. До почетокот на јули била погодена речиси секоја поголема рафинерија во земјата, а само во првите две недели од август биле нападнати уште десетина постројки.
Според пресметките на руското издание на „Forbes“, оштетените рафинерии сега претставуваат околу 54 отсто од вкупниот капацитет за преработка на нафта во Русија. Дневното производство на бензин во јули паднало на меѓу 75.000 и 80.000 тони, додека летната побарувачка се движи од 115.000 до 120.000 тони. Тоа создава дневен недостиг од околу 35 отсто.
Рускиот претседател Владимир Путин на крајот на јули призна дека постои проблем со снабдувањето, но го оцени како „некритичен“. Слична оценка повтори и вчера, иако призна дека нападите предизвикуваат штета.
Москва во јули го забрани извозот на бензин и дизел за да го заштити домашниот пазар, а дополнителни количества почна да обезбедува од Белорусија и Казахстан. Увозот на гориво од Белорусија во периодот од јануари до јули бил дури 25 пати поголем отколку во истиот период минатата година.
Русија првпат во својата историја почна да увезува бензин и од Мароко. Околу 30.000 тони бензин АИ-92 биле натоварени во Тангер и испратени кон Мурманск. Сепак, дел од увезеното гориво сè уште не стигнал до потрошувачите поради спор околу цената.
Според извори од руската индустрија, на кои се повикува порталот „InfoTEK“, значителни количества индиски и марокански бензин се наоѓаат во Мурманск. Добавувачите бараат меѓу 1.128 и 1.333 евра за тон, додека државниот регулатор инсистира на цена под 800 евра.
Дополнителен притисок врз снабдувањето се очекува во септември, кога рафинеријата „Новополоцк“ во Белорусија ќе биде на редовен ремонт. Белорусија е еден од клучните добавувачи на руското гориво, но нејзините две рафинерии заедно можат да извезат околу два милиони тони годишно, што претставува само мал дел од руските потреби.
