„Гостивар утре треба да добие технички исправна вода“, вели Мицкоски

Жителите на Гостивар се очекува уште утре да добијат технички исправна вода за користење, изјави премиерот Христијан Мицкоски на денешната прес-конференција, оценувајќи дека состојбата се санира во рекорден рок од една недела.

— реклама —

Тој посочи дека, иако водоводната мрежа е во надлежност на локалната самоуправа, Владата веднаш се вклучила во справувањето со кризата преку обезбедување донации со флаширана вода и ангажирање стручни екипи од ЈП „Водовод и канализација“ – Скопје за спроведување хиперхлорирање на водоводната мрежа.

— реклама —

„Екипи од скопскиот водовод во Гостивар работат на хиперхлорирање на инсталацијата. Очекувам уште утре да биде соопштено дека водата е технички исправна за користење. Ова се санираше во рекорден рок од една недела. Владата испорачува резултати и ќе продолжи така да работи“, изјави Мицкоски.

Во однос на критиките од опозицијата, премиерот оцени дека наместо конструктивен пристап, се пласираат, како што рече, неосновани обвинувања и се создава непотребна паника кај граѓаните.

— реклама —

Тој нагласи дека целосната одговорност за случајот ја испитува Јавното обвинителство, кое треба да утврди дали и каде има пропусти.

„Водоводот не е во наша ингеренција, но Владата веднаш обезбеди вода за пиење преку донации. Одговорноста за тоа што се случи во Гостивар ќе ја утврди Јавното обвинителство“, рече Мицкоски.