Градоначалникот на Град Скопје, Орце Ѓорѓиевски, најави поддршка за уредување на просторот околу седиштето на Македонската академија на науките и уметностите (МАНУ), со цел овој дел да добие достоинствен и репрезентативен изглед.
При заедничката обиколка со претседателот на МАНУ, академик Живко Попов, Ѓорѓиевски истакна дека Академијата претставува една од најзначајните институции во државата и симбол на науката, уметноста и знаењето.
„Како Град Скопје, ќе дадеме поддршка во уредувањето на просторот, со цел овој дел да добие достоинствен, убав и репрезентативен изглед каков што ѝ прилега на институција од вакво национално значење“, порача Ѓорѓиевски.
Тој нагласи дека институциите кои го чуваат знаењето, идентитетот и културната меморија на Македонија заслужуваат почит, грижа и вистинско внимание. При посетата беше констатирана потребата од дополнително уредување на просторот околу Академијата, за да се создаде средина соодветна на нејзиното значење.
