Повеќе скопски општини ги активираа своите кризни штабови и ги мобилизираа сите расположливи служби за справување со последиците.
Градоначалникот на Општина Аеродром, Дејан Митески, информираше дека веднаш по невремето е активиран Општинскиот кризен штаб, кој е во постојана координација со Министерството за внатрешни работи и Град Скопје. Екипите на општината се на терен и преземаат мерки за расчистување на последиците од силниот ветер. Тој ги повика граѓаните кои претрпеле штета истата да ја пријават во Полициската станица „Аеродром“, за да се изготват записници и навремено да се евидентира причинетата штета.
Градоначалникот на Општина Бутел, Дарко Костовски, соопшти дека Општинскиот кризен штаб е во полна подготвеност и дека е во постојана комуникација со Министерството за внатрешни работи, Град Скопје, јавните претпријатија, ЕВН и Центарот за управување со кризи. Тој информира дека дежурните екипи се на терен и им стојат на располагање на граѓаните, кои можат да пријавуваат штети и потреба од интервенција на телефонскиот број 078 517 344.
Градоначалникот на Општина Центар, Горан Герасимовски, соопшти дека веднаш по невремето свикал итен состанок на Општинскиот штаб за заштита и спасување. Како што информираше, во тек е координација на сите надлежни служби, по што екипите излегуваат на терен за увид во состојбата и преземање на сите неопходни мерки. Тој ги повика граѓаните да бидат внимателни, да избегнуваат непотребно движење додека трае невремето и сите забележани паднати дрвја, оштетена инфраструктура или други последици да ги пријават до Општина Центар преку официјалните канали за комуникација. Според него, сите надлежни служби остануваат во состојба на целосна подготвеност сè додека не бидат санирани последиците.
Од Општина Карпош информираа дека е формирана дежурна интервентна екипа, која постојано е на терен и активно ја следи состојбата на територијата на општината за навремена реакција при временски неприлики. Од општината ги повикаа граѓаните кои ќе забележат потреба од брза интервенција да се јават на телефонскиот број 071/322-790, притоа да ја наведат точната локација и краток опис на проблемот, за екипите да можат што побрзо да реагираат.
Надлежните служби и понатаму остануваат на терен, а општините апелираат до граѓаните да бидат внимателни и да ги следат препораките на институциите.
