Граната од 45 килограми пронајдена во Вардар кај Неготино, ДЗС безбедно ја отстрани

Дирекцијата за заштита и спасување (ДЗС) успешно отстрани неексплодирана артилериска граната од 155 милиметри, тешка околу 45 килограми, која потекнува од Првата светска војна. Опасното убојно средство било пронајдено во атарот на селото Пепелиште, во Општина Неготино.

— реклама —

Од ДЗС информираат дека интервенцијата била особено сложена поради непристапниот терен и фактот што гранатата се наоѓала во коритото на реката Вардар.

— реклама —

Со поддршка од Територијалната противпожарна единица од Неготино, која обезбедила чамец за пристап до локацијата, пиротехничарот Ѓорѓи Стефанов безбедно ја извлекол гранатата. Потоа, таа била транспортирана и обезбедена до нејзиното конечно уништување на армискиот полигон „Криволак“.

— реклама —

Од Дирекцијата упатија благодарност до ТППЕ Неготино за професионалната соработка и навремената помош при реализацијата на интервенцијата.

Воедно, ДЗС апелира до граѓаните доколку забележат сомнителни експлозивни средства да не ги допираат и не ги поместуваат, туку веднаш да го пријават случајот на бесплатниот број за итни повици 112.