Грчкиот министер за надворешни работи, Јоргос Герапетритис, порача дека Албанија мора целосно да ги почитува имотните права на грчкото малцинство доколку сака да напредува на патот кон членство во Европската Унија.
Како што пренесува „Екатимерини“, Герапетритис во обраќање пред грчкиот парламент истакнал дека Атина внимателно ја следи ситуацијата во Албанија, особено во контекст на протестите против контроверзен инвестициски проект на јадранското крајбрежје северно од Валона.
Проектот, кој е поврзан со компанија зад која стои Џаред Кушнер, зет на американскиот претседател Доналд Трамп, предизвика реакции поради наводи за корупција и дополнително ги зголеми стравувањата кај припадниците на грчкото малцинство во врска со заштитата на нивните имотни права.
„Активно го следиме прашањето за имотните права и лично му посочив на албанскиот министер за надворешни работи дека не може да има напредок во процесот доколку не постои целосно почитување на имотните права на малцинството“, изјави Герапетритис.
Тој нагласи дека Грција има силен интерес за интеграцијата на земјите од Западен Балкан во Европската Унија, но додаде дека европскиот пат на Албанија подразбира целосно почитување на меѓународното право, вклучително и поморското право.
Изјавите на шефот на грчката дипломатија доаѓаат во период кога односите меѓу Атина и Тирана повторно се под лупа поради прашањата поврзани со правата на малцинствата и сопственоста на земјиштето во крајбрежните области на Албанија.
