Гренланд го поддржа договорот со САД, „Златната купола“ на Трамп ќе се постави на островот

Повеќето пратеници во парламентот на Гренланд го поддржаа безбедносниот договор со Соединетите Американски Држави, иако опозицијата изрази сомнежи за неговата економска исплатливост. Договорот треба да помине на второ читање и на завршно гласање, по што се очекува и официјално да биде усвоен, објави „Ројтерс“.

— реклама —

САД, Данска и Гренланд го потпишаа договорот минатиот месец, со цел да се намалат тензиите по изјавите на американскиот претседател Доналд Трамп дека сака да ја преземе контролата врз стратешки важниот арктички остров.

Со договорот се проширува улогата на американската војска на Гренланд, што отвора можност за изградба на две нови воени бази и поставување на американскиот противракетен одбранбен систем „Златна купола“. Истовремено, договорот го потврдува данскиот суверенитет и правото на жителите на Гренланд на самоопределување.

— реклама —

Претседателот на опозициската партија „Налерак“, Пеле Броберг, оцени дека многу практични детали сè уште не се разјаснети. Тој предупреди дека САД добиваат широки права на територијата на Гренланд, без да биде гарантиран фиксен финансиски надомест за жителите.

— реклама —

Владејачките партии, кои имаат мнозинство во парламентот, застанаа во одбрана на договорот. Поранешната министерка за надворешни работи, Вивијан Моцфелт од партијата „Демократи“, изјави дека Гренланд добил значајна безбедносна заштита без да мора да ја плаќа, како и признание за својот статус на автономна нација.

Министерот за надворешни работи, Муте Егеде, оцени дека договорот претставува голем чекор напред, чие значење не може да се мери само преку финансиските придобивки.

Поддршка за договорот изрази и Ерик Јенсен, претседател на партијата „Сиумут“. Тој истакна дека неговата партија со години се залага договорите што се однесуваат на Гренланд да не се склучуваат без учество на самите Гренланѓани.