Груби и Бајрами се поздравија пред судењето за „Лотарија“, па вицепремиерот ги поздрави новинарите: ексдиректорот првпат на обвинителна клупа

Поранешниот генерален директор на „Државна лотарија“, Перпарим Бајрами, денеска првпат седна на обвинителната клупа во судскиот процес за случајот „Државна лотарија“, заедно со поранешниот вицепремиер Артан Груби и другите обвинети. Бајрами претходно беше недостапен за органите на прогонот и по него беше распишана меѓународна потерница, а на 9 септември сам се пријави на граничниот премин „Блаце“, по што беше спроведен во затворот „Скопје“.

Пред почетокот на денешното рочиште, Бајрами и Груби се поздравија во судницата. Груби, пак, при влегувањето им се обрати и на присутните новинари со прашањето: „Како сте?“.

— реклама —

Бајрами не присуствуваше на првото рочиште во предметот бидејќи во тој момент сè уште беше недостапен за органите на прогонот. По неговото предавање, тој денеска за првпат лично се појавува пред судот како првообвинет во предметот.

Покрај него и Груби, обвинети се Методија Димевски, Скендер Мехмети, Бојан Јанев, Фатмир Рамадановски, Александар Димитриоски и Башким Авдиу.

— реклама —

Обвинението го застапуваат јавните обвинители Даниел Коцев и Александар Давчевски. Според обвинението, предметот се однесува на дејства во текот на 2023 и 2024 година со кои обвинетите, како што тврди Обвинителството, ги пречекориле службените овластувања и предизвикале штета на „Државна лотарија“ во износ од 596.125.511 денари.

— реклама —

Груби е обвинет во предметот поради неговото постапување како тогашен прв вицепремиер и претседавач со владина седница на која била разгледувана точка поврзана со предметот. Обвинителите го гонат бидејќи претседавал со владината седница каде што се носела спорната одлука, но не ги гонат тие што гласале за неа.

На првото рочиште обвинетите што беа присутни се изјаснија дека не се виновни. Башким Авдиу, пак, рече дека не го разбира обвинението и побара тоа да му биде доставено во писмена форма на неговиот мајчин, албански јазик.

Бајрами беше генерален директор на „Државна лотарија“ од почетокот на 2022 до август 2024 година.

Денешното рочиште е прво на кое Бајрами и Груби заедно седат на обвинителната клупа во овој предмет.