Поради зголемена фреквенција на возила, на повеќе гранични премини во земјава се бележат подолги задржувања, информира Авто-мото сојузот на Македонија (АМСМ).
Според последните информации, на граничниот премин „Табановце“ за влез и излез од државата се чека околу 30 минути, додека на „Богородица“ за излез од државата задржувањето е околу три часа, а за влез околу еден час. На граничниот премин „Дојран“ за излез од државата, исто така, се чека околу три часа.
„На останатите гранични премини од македонска страна нема подолги задржувања за влез и излез од државата“, соопштија од АМСМ.
Во меѓувреме, Министерството за внатрешни работи информира дека во периодот од 2 август во 12:00 часот до 3 август во 12:00 часот, преку граничниот премин „Богородица“ поминале околу 17.500 лица.
Според податоците на МВР, во тој период во државата влегле 5.864 македонски државјани, а излегле 5.948. Кај странските државјани, влез оствариле 10.249 лица, додека од државата излегле 11.648.
На граничниот премин „Дојран“ во истиот период влегле 399 македонски државјани, а излегле 1.104. Од странските државјани, влез во државата оствариле 1.295 лица, а излез 1.174.
Од МВР велат дека се преземаат сите неопходни мерки и дека во функција се ставени сите човечки и технички капацитети за да се забрза протокот на патници, при истовремено спроведување на задолжителните гранични проверки.
