Продолжениот викенд донесе засилен интензитет на сообраќај на повеќе патни правци низ Македонија. Големи гужви се создадоа на автопатот Скопје–Тетово, каде поради зголемениот број возила на патарината беше отворена уште една лента за да се забрза протокот на сообраќајот.
Истовремено, традиционално за овој период од годината, Охрид се полни со домашни и странски туристи. На градските улици и кејот има голем метеж, а сообраќајот низ централното градско подрачје е значително отежнат.
Зголемениот број посетители се должи и на богатата културно-забавна програма. Во текот на продолжениот викенд во Охрид се одржуваат повеќе концерти и настани со домашни и странски изведувачи, што дополнително го зголемува бројот на гости во градот.
