Апелацискиот совет на Специјализираните совети во Хаг го продолжи до 27 ноември рокот за поднесување жалби на одбраната и обвинителството во предметот против поранешните водачи на УЧК, кои во првостепената постапка беа осудени за воени злосторства.
Советот делумно го прифатил барањето на одбраната за продолжување на рокот за поднесување жалби на првостепената пресуда. Истиот рок е продолжен и за Специјализираното обвинителство, соопштија Специјализираните совети.
Во одлука донесена денеска, Апелацискиот совет го утврдил и начинот на учество на жртвите во жалбената постапка. Притоа е одлучено да се применува слична практика како и во првостепената постапка, со потребните прилагодувања.
Во Апелацискиот совет се судиите Мишел Пикар, Кај Амбос и Нина Јоргенсен.
Специјализираните совети во Хаг на 16 септември ги осудија Хашим Тачи и Јакуп Красниќи на по 25 години затвор, Кадри Весељи на 18 години, а Реџеп Селими на 13 години затвор поради воени злосторства.
