Премиерот на привремените приштински институции, Албин Курти, реагираше по изрекувањето затворски казни за Хашим Тачи, Кадри Весели, Реџеп Селими и Јакуп Красниќи, оценувајќи ја одлуката како „неприфатлива неправда“ и порача дека таа мора да биде променета во жалбената постапка.
Курти, во видеообраќање објавено на Инстаграм, рече дека станува збор за „голема и штетна казна“ и изрази несогласување со прогласувањето на четворицата за виновни.
„Пресудата можеби формално е изречена во име на народот на Косово, но оваа празна формула не треба да се меша со волјата на народот. Оваа пресуда дефинитивно мора да биде променета и исправена во жалбената постапка, и тоа што е можно побрзо“, рече Курти.
Тој додаде дека во, како што ги опиша, тешки моменти е со семејствата на поранешните лидери на ОВК и со сите нивни соборци.
Хашим Тачи и Јакуп Красниќи се осудени на по 25 години затвор, Кадри Весели на 18 години, додека Реџеп Селими е осуден на 13 години затвор.
