Незадоволството по пресудите изречени во Хаг против поранешните лидери на УЧК продолжи и синоќа во Приштина, каде што голем број поддржувачи се собраа на главниот плоштад.
Демонстрантите носеле албански знамиња и знамиња на УЧК, а за време на протестот биле активирани пиротехнички средства и биле упатувани навреди кон Србите. Од толпата се слушале и извици: „Смрт на предавниците, слобода за ослободителите“.
На протестот се обратил Насим Харадинај, поранешен заменик-претседател на Организацијата на ветераните на УЧК, кој ги повикал демонстрантите да побараат од пратениците во Собранието на Косово да расправаат за пресудата на Специјализираните совети во Хаг на пленарна седница.
Меѓу присутните биле и функционери и пратеници од Демократската партија на Косово и од Алијансата за иднината на Косово.
Полицијата и натаму ги обезбедува владините згради во центарот на Приштина со засилени сили. Претходно, група Албанци незадоволни од пресудите фрлале камења кон зградата на Владата на Косово, при што биле искршени прозорци.
Во Хаг, вчера, Хашим Тачи и Јакуп Красниќи беа осудени на по 25 години затвор, Кадри Весели на 18 години, а Реџеп Селими на 13 години затвор за воени злосторства.
