Поранешниот претседател на Косово и поранешен лидер на Ослободителната војска на Косово (ОВК), Хашим Тачи, е осуден на 25 години затвор во Хаг, откако Специјализираните совети на Косово во Хаг го прогласија за виновен за повеќе воени злосторства.
Во истиот процес, за виновни се прогласени и Кадри Весели, Реџеп Селими и Јакуп Красниќи. Весели доби 18 години затвор, Селими 13 години, додека Красниќи е осуден на 25 години затвор.
Судскиот совет утврдил дека Тачи е виновен за противзаконско апсење на најмалку 386 лица, како воено злосторство, како и за сурово постапување, мачење и убиства. Според судските наоди, припадници на ОВК во периодот од април 1998 до јуни 1999 година убиле 96 лица кои не учествувале активно во борбите.
Меѓу лицата кои биле цел на дејствијата, според пресудата, биле политички и воени противници на ОВК, лица поврзани со Демократскиот сојуз на Косово (ЛДК) и ФАРК, лица поврзани со тогашните југословенски власти, како и припадници на етничките малцинства, вклучително Срби и Роми.
Сепак, судскиот совет заклучил дека обвинителството не ги докажало сите потребни елементи за злосторства против човештвото, меѓу кои и постоењето на широко распространет напад врз цивилното население.
Во образложението било наведено дека Тачи бил информиран за значителен број злосторства врз лица сметани за противници. Судот оценил дека тој имал суштински придонес во заедничкиот криминален план, а во одредени случаи и лично учествувал во злосторства.
Четворицата поранешни функционери на ОВК се во притвор во Хаг од ноември 2020 година. Процесот започна во април 2023 година, при што биле сослушани повеќе од 130 сведоци. Завршните зборови биле одржани во февруари годинава.
Тачи, Весели, Селими и Красниќи во текот на целата постапка се изјаснувале дека не се виновни. Одбраната на Тачи тврдеше дека не постојат директни докази кои го поврзуваат со злосторствата за кои беше обвинет.
Пресудата е првостепена.
