Хонорари од 129 милиони денари и продукција од 96 милиони: Митева ги објави трошоците за концертите за 8 септември

Вкупно 340.509.749 денари биле потрошени за програмата со која се одбележаа 35 години независност на Македонија, соопшти портпаролката на Владата, Марија Митева, презентирајќи го извештајот за реализацијата на манифестацијата. Програмата опфатила 18 настани во 13 градови низ земјата.

Според извештајот доставен од компанијата задолжена за реализација на проектот, најголем дел од средствата биле наменети за хонорари на артисти и изведувачи, продукција и логистички трошоци.

— реклама —

За хонорари на артисти и изведувачи биле издвоени 129.307.500 денари, за продукција 96.272.512 денари, а за логистика 58.527.037 денари. Дополнително, за хонорари на соработници биле прикажани 53.570.250 денари, додека маркетингот чинел 2.832.450 денари.

— реклама —

Митева истакна дека целта на програмата била да се поврзат различни генерации, градови и уметници, со посебен акцент на македонската музика и домашните изведувачи. Како еден од главните проекти го посочи музичко-сценскиот караван „Силно светнал ден“, кој поминал низ 11 градови и вклучил 41 македонски вокален изведувач, 20 професионални танчери, актери и оркестар од 15 музичари.

Програмата опфатила и концерт со настап на светски познатиот тенор Хозе Карерас, во придружба на Македонската филхармонија, како и концерти на домашни и странски музичари. Меѓу нив биле Стив Аоки, Пол ван Дајк, Пол Оукенфолд и Дејвид Гета.

— реклама —

Централниот концерт за 8 септември се одржал на Националната арена „Тодор Проески“ во Скопје, со настап на Дејвид Гета и продукцијата „The Monolith Show“. Според доставениот извештај, настанот го посетиле околу 50.000 луѓе, а реализацијата вклучувала голема сценска конструкција, ЛЕД-екран долг 32 метри, светлосни и ласерски ефекти и специјална заштита на тревната површина на стадионот.

Во извештајот се наведува дека настаните биле бесплатни за граѓаните и дека програмата имала цел да ја афирмира македонската култура, истовремено овозможувајќи настапи на меѓународно познати уметници.

Митева порача дека јавноста треба да има целосен увид во реализацијата на програмата, нејзината културна вредност и распределбата на средствата. Финансиските податоци, како што посочи, се презентирани во извештајот доставен од компанијата задолжена за организацијата.