Марија Митева, претседателка на Унијата на жени на ВМРО-ДПМНЕ, категорично ги демантира тврдењата на потпретседателот на ДУИ, Бујар Османи, дека имало комуникација со претставници на ВМРО-ДПМНЕ во врска со можноста за предвремени парламентарни избори.
„Апсолутно немаме никаква комуникација со ДУИ, најмалку со Бујар Османи. Очигледно е дека сака да биде активен, а ако не е етничка провокација, тогаш шири невистини“, рече Митева.
Нејзината изјава следува откако Османи во гостување во емисијата „Клик Плус“ на ТВ21 рече дека ДУИ бара предвремени парламентарни избори и дека очекува тие да се одржат веќе следната пролет.
На директното прашање дали ДУИ бара предвремени избори, Османи одговори потврдно.
„Да, бараме“, рече тој, осврнувајќи се и на претходната изјава на премиерот Христијан Мицкоски дека ВМРО-ДПМНЕ нема да бега од избори доколку опозицијата ги побара.
Османи тврдеше дека меѓу политичките партии веќе имало комуникација во различни форми и дека, според неговата проценка, во ВМРО-ДПМНЕ нема голем отпор кон идејата за предвремено парламентарно гласање.
„Нормално, во различни форми се комуницирало и кај нив. Нема некој голем отпор во таа насока и очекуваме дека некаде следната пролет ќе има предвремени избори. И ние се подготвуваме за тоа“, изјави Османи.
Тој, сепак, не кажа со кого конкретно од ВМРО-ДПМНЕ била остварена комуникацијата, ниту посочи дека бил одржан официјален состанок меѓу двете партии.
