На вчерашната седница на Извршниот комитет на ВМРО-ДПМНЕ беа избрани новите претседатели на Унијата на жени и на Унијата на млади сили на партијата.
За претседателка на Унијата на жени е избрана Марија Митева, која воедно ја извршува и функцијата портпарол на Владата.
Извршниот комитет избра и нов претседател на Унијата на млади сили. На оваа функција е именуван Тодор Коневски, за кого од ВМРО-ДПМНЕ велат дека е млад и перспективен кадар со силна енергија и потенцијал.
Тодор Коневски преку социјалните мрежи упати благодарност до претседателот на партијата, Христијан Мицкоски, и до Извршниот комитет за довербата да ја предводи, како што истакна, најголемата и најсилната младинска политичка организација во државата.
Коневски посочи дека неговиот пат во Унијата започнал во 2016 година и дека во изминатите години секоја обврска и предизвик претставувале дополнителна мотивација за работа и напредок.
Со овие кадровски промени, партијата го обнови раководството на двете свои организации, кои се дел од нејзината внатрешна структура.
