Ескалацијата на борбите во Јемен се продлабочува откако Хутите започнаа обиди за заземање стратешки планински позиции со цел да ги отсечат преостанатите подрачја под контрола на силите поддржани од Саудиска Арабија од брегот на Црвеното Море, пренесува „Ројтерс“.
Хутите, кои се поддржани од Иран, во текот на овој месец, во брз продор, го зазедоа брегот на Црвеното Море и ги потиснаа силите на меѓународно признатата јеменска влада, која има поддршка од Саудиска Арабија.
Според пет јеменски воени извори, Хутите сега се обидуваат да ги преземат стратешките височини познати како планините Кахбуб, во провинциите Таиз и Лахиј. Тие планински масиви го одвојуваат брегот на Црвеното Море од јужните области под контрола на владините сили.
Борбите се водат околу планинскиот округ Ал-Вазија во провинцијата Таиз и подрачјето Рас ал-Ара долж брегот. Според изворите, со заземањето на височините, Хутите би обезбедиле подобра позиција за своите сили во близина на теснецот Баб ел-Мандеб и би можеле да отворат нови фронтови.
Хутите тврдат дека Саудиска Арабија во последните денови извршила стотици воздушни напади врз нивните позиции. И покрај воздушните напади, владините сили поддржани од Ријад продолжиле да се повлекуваат.
Според податоците на Обединетите нации, во досегашните борби загинале речиси 700 лица, илјадници се повредени, а повеќе од 120.000 Јеменци се раселени во земјата. Илјадници други ја напуштиле земјата преку Црвеното Море.
Во меѓувреме, ситуацијата создава дополнителен притисок врз снабдувањето со енергенси. Контролата врз Баб ел-Мандеб би можела да ја загрози алтернативната рута што Саудиска Арабија ја користи за извоз на нафта за да го избегне Ормускиот Теснец.
Зголемените тензии веќе влијаат врз транспортот на нафта. Според сателитските податоци, саудискиот извоз преку Ормускиот Теснец во последните денови достигнал околу 2,9 милиони барели дневно, наспроти 700.000 барели во август.
Во исто време, се зголемуваат и трошоците за поморскиот транспорт, додека дипломатските напори за пошироко решавање на конфликтот остануваат во застој.
