Продолжуваат нападите врз Јемен: 33 загинати и 39 повредени

Бројот на загинати во саудиските воздушни напади врз Јемен се зголеми на 33, додека 39 лица се повредени, објавија медиумите под контрола на јеменските бунтовници Хути. Првичните информации говореа за најмалку 22 загинати и 30 повредени.

— реклама —

Меѓу жртвите во местото Ал Шарија, источно од главниот град Сана, има жени и деца, пренесува Би-Би-Си. Во нападите во саботата биле уништени пет куќи, а потрагата и спасувачките активности продолжуваат.

— реклама —

Нападите следувале еден ден по ударот врз преполн пазар во југозападната јеменска област Таиз, каде што загинале најмалку 30 лица, а осум биле повредени. Хутите и претставниците на јеменските власти меѓусебно се обвиниле за одговорност за нападот.

— реклама —

Новите напади се случуваат во период на засилени судири меѓу Хутите и владините сили, кои имаат поддршка од коалицијата предводена од Саудиска Арабија. Во меѓувреме, продолжуваат воздушните напади низ Јемен, како и ракетните напади и нападите со беспилотни летала врз територијата на Саудиска Арабија, за кои одговорност преземаат Хутите.

— реклама —

Јемен е зафатен од вооружени судири од крајот на 2014 година, кога Хутите го зазедоа главниот град Сана и поголем дел од северниот дел на земјата. Коалицијата предводена од Саудиска Арабија во 2015 година започна воена интервенција во поддршка на меѓународно признатата јеменска влада.